Wie waas 't vreuger?

Vastelaovend waerde in Hirkebosj al op kleine sjaol gevierd langk veurdet ein aantal Hirkebossjer jónges same besjlaote óm ein vastelaovesvereniging op te richte. ’t Fees beperkte zich toendertied toet de vastelaovesdeesdig, eine inkele verkleide vastelaovesgek leip euver sjtraot, de jeug achter ’m aan en die zóng dan:

Vastelaovend is eine gek, 
aan de sjouw dao hingk ’t sjpek,
aan de zolder dao hingk de worsj,
morge hóbbe veer geine dorsj.

Groepsfoto C.V. d’n Doal – Jaore 50

In ’t histories jaor 1937 waerde in de regio inkele vastelaovesvereniginge opgerich. Dit bleef ouch in Hirkebosj neit onopgemerk en dus ontsjtóng ’t idee óm ouch in Hirkebosj ein vastelaovesvereniging op te richte. De oprichtingsvergadering waerde gehaje in ’t cefeé van de elders van oze grootvors Dhr. Sjang Snijders en nao inkele glazer beier waerde besjlaote óm de vereniging de naam D’n Doal te gaeve. Dit ómdet dae vogel karakteristiek waas veur ’t gezich van Hirkebosj, mit name de kirktore waas ein geleefde sjtek veur de Doale.

Bie ein vastelaoves-vereniniging heurt eine prins, dus waas ’t aan de wieze raod óm in 1937 de eerste prins van D’n Doal in Hirkebosj te keize. Dees eer waerde toebedeild aan Harry van Birgelen. Mit hoog heuj en jacquets van de wiefkes van Borkelmans oet Remunj waerde de prins toen op vastelaovesdeesdig, mit paerd en kèr door de sjtraote van Hirkebosj gereje. De optoch waas ontsjtange.

De kirk zorgde d’r toen veur det de vastelaovend in Hirkebosj pas op deesdigaovend gehaje kósj waere, ómdet ’t lof óm 3 en óm 5 oer gehaje waerde. De toenmalige pesjtoor Linssen bepaolde det pas daonao tied waas veur vastelaovend, zodoonde waerde de deesdig de optochdaag. De opvolger van deze pesjtoor, pesjtoor Ros sjafde ’t late lof aaf.

jaren 50 groepsfoto CV D'n Doal 1920x1168

Groepsfoto C.V. d’n Doal – Jaore 50

In de jaore daonao (1938 toet en mit 1946) sjtóng de vastelaovend op ein heel leeg pitje vanwaege de oorlog. In die periode waerde d”r dan ouch gein prinse oetgeroupe. In 1947 waerde de vastelaovend weer nuuj laeve ingeblaoze. Frits Boonen, dae later nao Australië emigreerde, waerde toen prins.

De kleier waerde ouch verangerd. In de wirkplaats bie de sjmeed waerde nuuij manjtels gesjneje, en d’r kwame ouch gesjteve papiere krage en zelf gemaakde mötsje. In ‘t begin van d’n aovend zoote die dinger goud, maar wie later det ’t waerde, wie sjlechter det die dinger oet kwame te zeen. Veur iddere aktiviteit waerde de manjtels sjiek opgesjtreke. De manjtels en de mötsje waerde later nag ins aan Vlorp verkoch.

Bie de vastelaovend heurde ouch meziek, maar duur technische installaties zo-es noe ware d’r in dae tied nag neit dus zónge de lede van D’n Doal heur eigese leedjes. In dae tied is ouch ‘t originele Doale-leed ontsjtange:

Wat höbbe veer os weer lang ingehaaije
Os dórpke leek waal dood
Maar loat ós noe nog ins begaaije
Jao dan kump ’t zo weer goud
Daoróm loester alllemaol nao oze gooije Doal
Kaak

Refrein: Carnaval is weer in t lanjd
Zit allemaol noe blie
Reik idderein noe weer de hanjd
Jónges en maedjes en alles bie-ein, dan is de vastelaovend fijn.
Dan zaet D’n Doal Kaak Kaak-(2X)

 

1954 prinsewage 500x578

Prinsewage – 1954

Langkzaam mer zeker floreerde de vereniging en de vastelaovend in Hirkebosj. D’n Doal stjrekde zien vleugels oet toet euver de qrenze en contacte waerde gelach mit vastelaovesvereniginge oet Reyth, Geistenbeck en Düsseldorf. D’n Doal zaag wie de vastelaovend in Pruusjes georganiseerd waerde en zo begósjte ouch in Hirkebosj de Bonjte Aovende mit óngerangere Fred Ruiters en Harrie Peeters es Driek van de Paekdraod oet Sjwame. Later ouch mit de pas beginnende Pierre Cnoops. Hiedoor waerde Hirkebosj door de ómgaeving tiedes de vastelaovend “Klein Kölle” genump.

In de jaore 50 besjikde D’n Doal ouch euver eine Nar. De contacte mit Pruusjes bleive gehandjhaaf en minnigmaol noom ’t fanfarekorps “Die Blauwe Jungs” oet Reyth aan de optoch deil.

1958 groepsfoto CV D'n Doal 1920x1341

Groepsfoto C.V. d’n Doal – 1958

De Zeiverlap, ein vastelaovesgezit oet vruiger jaore, verzorg en gemaak door de sjötterie, waerde in 1975 nuuj laeve ingeblaoze. Har Minkenberg trok dao in dae tied de kèr veur.

Wie ós vereniging in 1981, 4X11 jaor besjtóng waerde ’t B.C.L.-treffe op ein succesvol meneer georganiseerd.

In 1985 – 1986 waerde väöl historische Hirkebossjer vastelaovesleedjes en sjlagers op de langksjpeelplaat “Hie kaak Hirkebosj” vasgelach door D’n Doal. Väöl naamsbekindheid krege ouch de Limburgse Bónjte Aovende wovan d’r ein aantal zeen opgenaome en oetgezónje door Omroep Limburg.

 

1974 optocht 1920x1270

Optoch – 1974

Groepsfoto C.V. d’n Doal en Doale-eier – 1979