In 6 rundjes van 11 vraoge teste veer uch kènnis euver Vastelaovend. En gaon veer kieke waem de meiste puntje biejein kint score. Waem moog zich de eerste winnaar van de “Grote Vastelaoves Kwis” van Klein Kölle nömme?
Maar veer gaon neit allein maar ‘nne kwis sjpele. Nao idder twee rundjes höbbe v’r ’n pauze. Tiedes dees pauze haje v’r ‘nne online ‘Vastelaoves Leedjes ‘Bingo’. Teves vraoge veer alle deilnömmers om zich te verkleije. Want de hoofpries geit nao de sjoonst verkleijde! De prieze waere drék nao aafloup oetgereik door Gaston.

Maar noe vroag geer uch waarsjienlik aaf: wie geit det dan?
Via ‘n online meeting (ZOOM) zalle alle deilnömmers digitaal same kómme. De kwis wird gepresenteerd door twee leje vanne Road. De vraoge kómme in beeld op uch kompjoeter sjerm. En antwaorde geit op de tillefoon via ‘nne app “KAHOOT”. Dae app hilt van idderein dae mit duit de scores biej.
’t Enige waat geer dus neudig höb is ‘nne kompjoeter of laptop mit internetverbinjing. En ‘nne smartphone wo apps op gezat kinne waere. Nao insjrieving ontvangt geer per mail ‘n handleiding mit meer informatie. Dao in wird sjtap-veur-sjtap oetgelag waat geer veuraaf mot doon om mit te kinne sjpele.

Doot mit! Es einzelganger, mit ’n duo, kleine groep of mit ’t ganse gezin! Vastelaovend is natuurlik ’n fees om same te viere mit vrunj, femilie en bekèndje. Maar kom neet onneudig same, maak ’t gezellig op aafstandj! Haaj uch dan ouch aan de geldende Corona maotregele.
Mit doon kos €20,- per hoes/deilname. Geer krieg dao veur ouch ein gezellig goudgevuld pakket aangeboje mit de Bingokaart en vanalles lekker om de aovend goud door te kómme. Insjrieve kin hiejónger mekkelik en sjnel tot en mit gonsdig 10 fibberwari. En noe v’r toch digitaal bezig zeen zalle veer, nao uch insjrieving, ein Tikkie of betaalverzuik sjture om ’t insjriefgeld te voldoon.

Kaak & Alaaf
CV d’n Doal