Waope C.V. D’n Doal

Dit waope is oetgeprakkezeerd door Geert Schallenberg ter gelaegenheid van ’t 4 x 11 jaorig besjtoan van D’n Doal en haet de volgende beteikenis:

Van ónger nao baove zeet geer óm te beginne de herk of de raek van Hirkebosj. De herk is gans van sjtaag en lik in ein röshaaijing. Es geer efkes hoger kiek dan zuut geer dao eine leeuw, dae zo te zeen erg muig is, in idder geval lik hae op ziene rök en alsof det nag neit genóg is, hae is zich d’r eine aan ’t pitsje. Zónne leeuw toch, lekker luij lik d’r dao te drinke. Veer kieke weer ein sjtókske hoger en dan zeen veer det ’t waope auch nach gesierd weer mit brons-, gruin-, en eikehout. Brons haet nieks mit herte te make, en gruin auch nieks jónk. En det eikehout, d’r zeen luuj die det waal ins nuidig höbbe (om zich ins meug op te make). En dan dao helemaol baove, jao geer zuut ’t goud. Dao zit oze Doal Sjaak, dae toen al 4 x 11 jaor fees haed geviert. Hae haed ein prinsemuts op en hae zjwejt mit de scepter euver Klein Kölle. Ongertösje is de vereniging al get aajer en Doal Sjaak viert nag sjteeds fees. ‘t Waope zo-es de vereniging ’t noe gebroek is mer ein klein bietje verangerd. ‘t 4 x 11 baove de leeuw is noe verdwene, en ’t 1981 wat ónger bie de plaatsnaam Herkenbosch sjteit is verangerd in 1937, ’t jaor van de oprichting.

(De beteikenis van dit waope is deils euvergenaome oet
de 4 x 11 jubileum-zeiverlap)