Carnavalsvereniging D’n Doal is sins 1999 auch te bewonjere op internet. Veer höbbe besjlaote óm uch op dees pagina’s ein klein sjtökske geschiedenis van dees vereniging aan te beeje. De Lede die op dit moment bie de vereniging zeen, höbbe van dees gschiedenis mer ein klein sjtökske mitgemaak. ’t Grótste gedeilte van dees geschiedenis is opgeteikend oet gesjprekke die mit oze grootvors Sjang zeen geveurd. Helaas is grootvors Sjang os, net es alle angere oprichters vanne Doal, auch ontvalle. Sjang veur al diene inzat veur de Hirkebossjer vastelaovend danke veer dich vanaaf dees plaats van herte.

Van de eerste Doale

toet 62 jaor later...

Vastelaovend waerde in Hirkebosj al op kleine sjaol gevierd langk veurdet ein aantal Hirkebossjer jónges same besjlaote óm ein vastelaovesvereniging op te richte. ’t Fees beperkte zich toendertied toet de vastelaovesdeesdig, eine inkele verkleide vastelaovesgek leip euver sjtraot, de jeug achter ’m aan en die zóng dan:

Vastelaovend is eine gek,
aan de sjouw dao hingk ’t sjpek,
aan de zolder dao hingk de worst,
morge hóbbe veer geine dorjs.

In ’t histories jaor 1937 waerde in de regio inkele vastelaovesvereniginge opgerich. Dit bleef auch in Hirkebosj neit onopgemerk en dus ontsjtóng ’t idee óm auch in Hirkebosj ein vastelaovesvereniging op te richte.
De oprichtingsvergadering waerde gehaaije in ’t cefeé van de elders van oze grootvors Dhr. Sjang Snijders en nao inkele glazer beier waerde besjlaote óm de vereniging de naam D’n Doal te gaeve. Dit ómdet dae vogel karakteristiek waas veur ’t gezich van Hirkebosj, mit name de kirktore waas ein geleefde sjtek veur de Doale. Bie ein vastelaoves-vereniniging heurt eine prins, dus waas ’t aan de wieze raod óm in 1937 de eerste prins van D’n Doal in Hirkebosj te keize. Dees eer waerde toebedeild aan Harry van Birgelen. Mit hoog heuj en jacquets van de wiefkes van Borkelmans oet Remunj waerde de prins toen op vastelaovesdeesdig, mit paerd en kèr door de sjtraote van Hirkebosj gereje. De optoch waas ontsjtange. De kirk zorgde d’r toen veur det de vastelaovend in Hirkebosj pas op dinsdigaovend gehaaije kósj waere, ómdet ’t lof óm 3 en óm 5 oer gehaaije waerde. De toenmalige pesjtoor Linssen bepaolde det pas daonao tied waas veur vastelaovend, zodoonde waerde de dinsdig de optochdaag. De opvolger van deze pesjtoor, pesjtoor Ros sjafde ’t late lof aaf.

In de jaore daonao (1938 toet en mit 1946) sjtóng de vastelaovend op ein heel leeg pitje vanwaege de oorlog. In die periode waerde d"r dan auch gein prinse oetgeroupe. In 1947 waerde de vastelaovend weer nuuj laeve ingeblaoze. Frits Boonen, dae later nao Australië emigreerde, waerde toen prins. De kleier waerde auch verangerd. In de wirkplaats bie de sjmeed waerde nuuij manjtels gesjneje, en d’r kwame auch gesjteve papiere krage en zellef gemaakde mötsje. In "t begin van d’n aovend zoote die dinger good, maar wie later det ’t waerde, wie sjlechter det die dinger oet kwame te zeen. Veur iddere aktiviteit waerde de manjtels sjiek opgesjtreke. De manjtels en de mötsje waerde later nag ins aan Vlorp verkoch. Bie de vastelaovend heurde auch meziek, maar duur technische installaties zo-es noe waare d’r in dae tied nag neit dus zónge de leeje van D’n Doal heur eigese leedjes. In dae tied is auch 't originele Doale-leed ontsjtange:

Wat höbbe veer os weer lang ingehaaije
Os dórpke leek waal dood
Maar loat ós noe nog ins begaaije
Jao dan kump ’t zo weer goud
Daoróm loester alllemaol nao oze gooije Doal
Kaak

Refr: Carnaval is weer in t lanjd
Zit allemaol noe blie
Reik idderein noe weer de hanjd
Jónges en maedjes en alles bie-ein, dan is de vastelaovend fijn.
Dan zaet D’n Doal Kaak Kaak-(2X)

Langkzaam mer zeker floreerde de vereniging en de vastelaovend in Hirkebosj. D’n Doal stjrekde zien vleugels oet toet euver de qrenze en contacte waerde gelach mit vastelaovesvereniginge oet Reyth, Geistenbeck en Düsseldorf. D’n Doal zaag wie de  vastelaovend in Pruusjes georganiseerd waerde en zo begósjte auch in Hirkebosj de Bonjte Aovende mit óngerangere Fred Ruiters en Harrie Peeters es Driek van de Paekdraod oet Sjwame. Later auch mit de pas beginnende Pierre Cnoops. Hiedoor waerde Hirkebosj door de ómgaeving tiedes de vastelaovend "Klein Kölle" genump.
In de jaore 50 besjikde D’n Doal auch euver eine Nar. De contacte mit Pruusjes bleive gehandjhaaf en minnigmaol noom ’t fanfarekorps "Die Blauwe Jungs" oet Reyth aan de optoch deil.  De Zeiverlap, ein vastelaovesgezit oet vruiger jaore, verzorg en gemaak door de sjötterie, waerde in 1975 nuuj laeve ingeblaoze. Har Minkenberg trok dao in dae tied de kèr veur. Wie os vereniging in 1981, 4X11 jaor besjtóng waerde ’t B.C.L.-treffe op ein succesvol meneer georganiseerd. In 1985 - 1986 waerde väöl historische Hirkebossjer vastelaovesleedjes en sjlagers op de langksjpeelplaat "Hie kaak Hirkebosj" vasgelach door D’n Doal. Väöl naamsbekindheid krege auch de Limburgse Bónjte Aovende waovan d’r ein aantal zeen opgenaome en oetgezónje door Omroep Limburg. ’t 6X11 jaorig besjtaon van ós vereniging is eine nuuje mijlpaol in dees historie. Veer zeen d’r trots op det de vastelaovend in Hirkebosj van die meer dan 66-jaor ein vaste en werm plaats in de herte van väöl Doale en Dölkes gevonje haet.

 (Mit dank aan idderein dae get aan dit sjtökske historie haet biegedrage.)